اسئله للاستاذ محمد ؟

هاانا ذا وقد عدت الى اسئلتى المزعجه يااستاذ محمد وارجو الرد ع هذه الاسئله من حضرتك:
1-من كاتب وملحن اغنيه مهما خدتنى المدن لو حضرتك عارف يعنى؟
2-مارأى حضرتك فى اغنيه منيش خاين؟
3-مارأى حضرتك فى اغانى بعدين وياكى-راجع؟
4-هل اغنيه ف قلبى جرح كانت من فيلم؟
5-هل كل افلام عماد عبد الحليم فشلت ايامها كلها كلها ولا فى فيلم معين نجح؟وايضا المسرحيات نجحت ولا؟
6-ماذا كان يقول عماد عبد الحليم عن انغام وعن صوتها ولا مقالش اى حاجه عنها؟
7-هل فيه اغنيه لهانى شاكر او محمد ثروت او محمد الحلو كنت تتمنى ان عماد يغنيها بصوته؟
8-مارأى حضرتك عامه ف تمثيل عماد؟
9-هل اغانى عبدالحليم حافظ القصيرة تليق على صوت عماد ؟
10-هل اغنيه من غير ليه بصوت عماد هنا ف المنتدى انا مش لاقياها الصراحه؟ياريت حضرتك تشاورلى ع المكان بالظبط لو موجوده هنا؟
واخيرا لايسعنى الا ان اشكر حضرتك شكرا جزيلا جدا جدا جدا جدا وهذا الشكر اولا واخيرا على تحملك -حتى الان- لازعاجى وانا لن اصدم لو حضرتك عبرت عن ضيقك الشديد منى بجد والله

بس والله اجابات وردود حضرتك قمه فى الروعه والابداع والجمال وكل حاجه حلوة اجمل واصدق ردود ف المنتدى كله وحضرتك بتساعد الجيل الجديد ده ع فهم حاجات كتير عن الرائع الراحل عماد ع عكس بقيه الاعضاء اللى بينزلوا حاجات روعه فعلا بس من غير شرح وعموما المنتدى كله اكتر من رائع

:) :) :)

اولا وقبل كل شئ اشكر حضرتك من كل قلبى ولو ردود حضرتك اراء شخصيه بس هى هامه ع الاقل بالنسبه ليا
1-اغنيه مهما اجمل اغنيه سمعتها عن الام اجمل من حيث اللحن والاداء والكلمات والصوت وجمال سلامه مبدع اوى مع عماد
2-منيش خاين مفيش كلمات تعبر عن جمالها الصراحه اكتر من رائعه ومينفعش والله اى مطرب يغنيها ابداااااا وهى بتصيبنى بمليون صدمه الصراحه
3-اغانى راجع وبعدين وياكى مش وحشين بس بيتهيألى المفروض مكنش يغنيهم وانا فاكرة سمعت زماااان ف الاذاعه بعدين وياكى بس مكنتش عارفه مين اللى بيغنى طبعا بس فعلا راجع اجمل
4-انا برده شايفه ان اجمل فيلم عذاب الحب الاغانى رائعه وانا بحب مديحه كامل جدااا اصلا ده غير ان كان دمه خفيف ف الفيلم
5-اضعفهم صوتا بس اجملهم واحلاهم وارقهم وانا مش شايفه ان ده ضعف ف الصوت انا شايفه ان ده احساس يغنى
ولا يسعنى الا ان اشكر حضرتك مره اخرى بس اللى ملاحظاه ان اجمل اغانى لعماد الحان اخوه وجمال سلامه وحلمى ف قلبى جرح

وانا بسأل حضرتك بالذات لانى فعلا مصدقت لقيت حد بيحب صوت عماد زيي انا اول ماسمعت صوت عماد دايما كان يؤثر فيا بس فيه ناس كتير يعنى كده مش بيأثر فيهم وانا كنت متردده انا صح ولا غلط هو صوته فعلا مؤثر لدرجه انه بقى بيأثر فيا عن حليم حتى. حتى دايما بقول اغنيه غريب اصدق بكتير من لست ادرى اللى غناها حليم.المهم انا قبل اما اشتركت ف المنتدى كنت خلاص هبدأ ابعد عن سماعه لغايه بقى اما عرفت انى انا صح وفعلا حضرتك بيتقول اللى انا بحس بيه لما بسمعه بالظبط فيعنى كفايه اوى حد واحد كمان يؤيدنى

وكويس ان حضرتك لسه فاكر اسمى فيه ناس كتير مصممه انى ولاء بس انا بطنش ههههه

اه انا نسيت اقول لحضرتك ان اشتراكى ف المنتدى ده كان اخر خطوة هعملها قبل ماابتعد عن سماع عماد عشان كنت عايزة اشوف عشاقه دول بيشعروا بنفس اللى بشعر بيه ولا لأ وكمان عشان ضميرى يكون مستريح قبل مابتعدعن سماع هذا الصوت الرائع لكن انا تأكدت الحمد لله ان صوت عماد عبد الحليم لا يعوض ولايمكن اصلا الابتعاد عنه الصراحه
وشكرا مرة اخرى على تذكر حضرتك لاسمى :|