بحبك

موضوع سنة أولى ثورة الذى كتبه الأستاذ محمد ، ذكرنى بقصيدة كتبتها فى 10-3-2003وصفاً لحال مصر قبل الثورة ، ولم أكن أحب أن انشرها لما فيها من معانى اليأس وخيبة الأمل ، ولكن يبدو ان موعد نشرها المناسب هو الآن ، رداً على النادمين على أيام مبارك والمتأسفين له والقائمين بمظاهرات من أجله !
ربما انشرها للذكرى وللتاريخ و لوداع سنة أولى ثورة ، صحيح لم نحقق شئ للآن ولكن الثورة وخلع الرئيس مكسب فى حد ذاته ، وإن شاء الله سيتوالى الفرج وتنكشف الغمة ،
فإذا الشعب يوماً أراد الحياة .. فلابد أن يستجيب القدر ، ولكن " إن الله لا يغير ما بقوم حتى يغيروا ما بأنفسهم "
والثورة بداية تغيير انفسنا ، معذرة أطلت الكلام ، إليكم القصيدة

بحبك ايوه بحبك
لكن قلبى انكسر ..
يا بلدنا ياقمر
ليه شوهوكى وشوهونا
وقتلوا فينا الأمل
الظلم فيك يا مصر
ساد وانتصر
واسطة وتزييف
وكمان "زيس"
سرقوا فلوسنا باسم القروض
وغابوا عن النظر
غير اللى بيسمونا ويمرضونا
مستغلين حاجة البشر
حتى قوت الغلبان
صبح مرعى للغيلان
والحق جوه الحناجر إنحشر
************
يا مصر شبابك فى خطر
بانجو وبطالة
وخيبة تقيلة ..
سطحية وتفاهة
وقلة حيلة ..
كلمة خطر ..
دى كلمة قليلة !
بمين ي مصر بكره هنفتخر ؟!
يا مصر إنت فى..... خطر

لا ازاى حضرتك تقولى معذرة أطلت الكلام واذا كنا بنحب كلامك يادكتورة وسيمه وانا كمان بحب اقرأ كلامك واشعارك
والمقدمه جميله والقصيده اجمل ومعناها حلو
وقتلوا فينا الأمل فعلا يادكتورة الامل ضاع وخاصه عند الشباب مع ان الامل ده كان حاجه بتصبر لكن حتى الصبر ده راح فانتشر اليأس وفقدان الامل وانا ارى ف الجامعه شباب اقرب مايكون الى الضياع كما انتشرت ايضا حالات الانتحار بين الشباب وسمعت عن ذلك ف الجامعه

بمين يا مصر بكره هنفتخر ؟!
يا مصر إنت فى..... خطر
حلوة اوى الخاتمه يادكتورة وسيمه يامبدعه بس ان شاء الله هنفتخر بمصر بكرة وهتتظبط الاوضاع بس امتحاناتى تخلص بس ههههههههه وان شاء الله الخطر يزول
تسلم ايدك يادكتورة وسيمه وشكرا ع ابداعك الدائم واتمنى بجد الا تحرمينا من قصائدك بين الفينه والفينه
امال اتلكك بايه بس بعد كده ياجماعه؟

هههههههههههههههههههههه الشعب المصرى ممكن يستجيب للسلفي وانا ايضا تمنياتى لكم جميعا بالسعاده وربنا يستجيب لعائك يااستاذ محمد يارب يوفق كل الطلبه التعبانيين ف دراسه الاداب واقسامها والكليات الشقيقه

شكراً يا استاذ محمد وكل عام وأنت وأسرتك بخير وصحة وسعادة يا رب ، وشكراً يا لولا على تعليقك الجميل وكل عام وانت وأسرتك بخير وصحة وسعادة ، ونباركلك إن شاء الله بالتفوق يا سعادة الوزيرة لكن بلاش تلاكيك !
والصورة التى نقلتيها لحال شباب الجامعة صورة دامية ، وأرجوكى ياوزيرة السعادة تنشرى بين زميلاتك الأمل ، لأن اليأس هو القتل بلا سلاح .

وحضرتك طيبه وبخير يارب وفى سعاده دائما وفى ابداع دائم والاهم ف تواجد دائم معنا ان شاء الله -ده كان قرار وزارى لو حضرتك تفتكرى-

لكن بلاش تلاكيك !
ههههههههههههههههههههههههههههههههههههههههههههههههههههههه هحاول يادكتورة وسيمه ههههههههههه

وأرجوكى ياوزيرة السعادة تنشرى بين زميلاتك الأمل ، لأن اليأس هو القتل بلا سلاح .
انا بنشره بين اصدقائى المقربين لكن باقى الكليه للاسف مقدرش الدكاترة بقى هى الكفيله بنشره لما بيصححوا بضمير
واقول لحضرتك حكايه سريعه:
رئيس قسم اللغه العربيه عندنا كان سقط طالب ف قسم العربى السنه الماضيه وهذا الطالب كان بيجيب تقدير علطول والطالب ده ذهب الى مكتبه لكى يرجوه ينجحه لكن رئيس القسم شتمه جامد تانى يوم كل الكليه عرفت ان الطالب ده انتحر للاسف بسبب معامله الدكتور وبسبب اليأس

الله يرحمه ، لكن هذا الطالب لا يمكن أن يكون شخصيته سويه ولو كان له حق فى النجاح فهناك طرق قانونية فكان ممكن يطالب باعادة تصحيح ورقته وكانت ستشكل لجنة من أساتذة التخصص وتقوم بذلك فهذا من حق الطالب قانوناً ، ولكن كما قلت للأسف هذا الطالب نموذج للشباب الذين يعانون من اضطراب فى شخصياتهم نتيجة أسباب كثيرة جداً ، ولكن اود أن اسألك هل تعرفين هذا الطالب أم مجرد أنك سمعت لقصته ؟ لأن الحقيقة قد تكون القصة كلها مجرد إشاعة أطلقها أحد أصحاب المصالح إما لنشر الكراهية بين هذا الأستاذ وطلابه أو للإضرار لأى سبب من الأسباب ، وعلى فكرة ليس بين أى أستاذ جامعى والطلاب أى عداء ولكن قد يحدث خطأ غير مقصود نتيجة ضغط العمل على الأساتذة وفى النهاية جميعنا بشر والخطأ وارد ، ولذلك عملوا للطالب حق المطالبة باعادة التصحيح وهذا وارد ويحدث فى جامعتنا وغالباً تجد اللجنة أن الطالب ليس له حق فى أى درجات زيادة ، واللجنة يتم تشكيلها بشكل موضوعى ، ولكن قد يحدث تجاوز أو ظلم من أحد الأساتذة فى حق طالب بسبب الإهمال أو اللامبالاة ، وفى هذه الحالة يجب مقاضاة هذا الأستاذ ، أما أن ينتحر الطالب فهذا قمة اليأس والاستسلام ، وماذا كان سيفعل التفوق مع طالب بهذه الشخصية الضعيفة الهشة ، كم من نجيب فى الدروس لاقى الحياة فلم ينجب ، بمعنى أن التفوق الدراسى ليس له معنى إذا كان الطالب غير ناجح فى مواجهة الحياة بضغوطها ومشاكلها ، وليس بحفظ واستظهار المفاهيم والنظريات والقوانين ، والرسول الكريم صلى الله عليه وسلم كان يستعذ فى دعاؤه من العلم الذى لا ينفع ، فالعلم يجب ان ينفع الانسان فى حياته وعمله وإلا ما قيمته ، أدعو الله أن يوفقنا جميعاً لما يحبه ويرضاه

لأ انا معرفوش بالطبع ولكن الحكايه انتشرت بين طلاب قسم اللغه العربيه ولى صدبقات فيه كما ان كمان ايامها قامت مظاهرات ضد رئيس القسم ده اللى معروف عنه ظلمه الشديد للطلبه وكمان استقصاده للطلبه الشاطرين بالذات
واعتقد ان الدكتور ده هو اللى شخصيته فيها اضطرابات بدليل تعمده تحطيم اى طالب متفوق وكمان معروف عنه الفاظه البذيئه وشتائمه اثناء شرح المحاضرات

بس كلام حضرتك صحيح جداااااااا ف الجمله دى يادكتورة وسيمه وماذا كان سيفعل التفوق مع طالب بهذه الشخصية الضعيفة الهشة كلام صحيح جداااااااااا بس بجد يادكتورة وسيمه الضعف ف مواجهه المشاكل مش بيد الانسان فيه حاجات بتبقى اقوى-لكن مش لدرجه الانتحار طبعا- بس ع الاقل هتصيب الانسان باليأس او الاحباط او انعدام الهدف ف الحياه وخاصه لو مفيش معاه حد يدعمه ويقف بجواره واظن يعنى الكروان عماد برده اتعرض لمثل هذه الضغوط والمشاكل اللى كانت صعبه وفى وقت تخلى عنه ف الجميع

واشكرك على ردك الممتع فعلا يادكتورة وسيمه والمفيد كمان وانا ع فكرة كان نفسى حضرتك فعلا تكلمى عن شخصيه المنتحر ولقيت حضرتك اكلمتى من نفسك بجد حاجه غريبه فعلا بس ده مش غريب ع شاعرة رقيقه احساسها عالى مثل حضرتك

رئيس القسم ده اللى معروف عنه ظلمه الشديد للطلبه وكمان استقصاده للطلبه الشاطرين بالذات
إذا كان الحال كذلك فعلى كل الطلاب الذين ظلمهم هذا الدكتور رفع قضية عليه وعمل محضر تعدى بالسب والقذف وساعتها التحقيقات تأخذ مجراها وممكن يتم وقفه عن العمل ، ولكن كيف لدكتور بهذه الصفات يظل بالكلية ويحصل على ترقيات حتى يصل لرئيس قسم ، صحيح فى واسطة وظلم ورشاوى ولكن لا يجب السكوت على ذلك لأن الساكت عن الحق شيطان أخرس ، ويجب تطهير الجامعات من مثل هذا الميكروب أقصد الدكتور ، ولكن يا لولا يجب التحرى والتبين جيداً كى لا يقع ظلم فنحن نرفض الظلم سواء للطالب أو للدكتور