مسرحية الطوابير !!

وقعت أحداث هذه المسرحية فى عهد مبارك ، ولا زال هذا العرض مستمراً إلى ما شاء الله

مسرحية الطوابير

المشهد الأول : شارع وبه عدة طوابير طويلة ، وهناك شخصان يسيران معاً

الأول : بص يمين ده طابور العاطلين ، خدلك مكان واحجز كمان للعيال اللى لسه جايين ، وبص شمال ده طابور الـ ... الثانى يقاطعه : عارفه ما تقوليش طبعاً ده طابور العيش ، والغريبة إنه ما بيمشيش ، وياما وقفت فيه علشان أطلعلى بريغيفين ويا ريتهم سُلام إلا كمان محروقين !
الأول : بص هناك فى النص .
الثانى مندهشاً : ودول يطلعوا مين ؟!!
الأول : ده طابور العيانين ، قصدى طابور التأمين
الثانى مستوضحاً : التأمين الصحى ؟!!
الأول منفعلاً : أيوه يا أخى
الثانى مندهشاً : اشمعنى ده اللى فيه ناس قاعدين ؟!
الأول ساخراً : دول اللى ماتوا والباقين لسه منتظرين
الثانى متشائماً : طب يللا بينا من هنا احنا مش ناقصين
الأول : استنى بس يمكن ناخد لنا قرصين فيتامين واللا اسبرين!!
الأول يشير لطابور آخر : بص كمان ده طابور التموين
الثانى بحسرة : بتاع العدس أبو جبه والسمنه البايظه والشاى اللى زى الصبغة وبنكهة الصراصير!
الأول يجز على أسنانه : أسكت بلاش كلام كتير ، تقدر تستغنى عنه أو تقدمه لضيف يكون تقيل ( يضحكا )

المشهد الثانى : شارع آخر ، مذيعة تليفزيونية معها مصور يحمل كاميرا

المذيعة : الآن أعزائى المشاهدين ننتقل بالكاميرا لنعرف رأى الجماهير فى الطوابير
[color:c534=violet]المذيعة تسأل احد الواقفين فى طابور العاطلين : قولى يا حاج شايفاك واقف فى طابور العاطلين مع إن لا مؤاخذة شكلك كده عدى الستين ، هو انت لسه عندك أمل فى التعيين ؟!
الحاج يجيب بصوت ضعيف مصحوب بكحه متقطعة : بصى يا بنتى أصل الطابور ده غيه ، فيه باسللى نفسى بدل قاعدة العواطلية !!
المذيعة تنتقل إلى طابور العيش
المذيعة تسأل إحدى السيدات : أنت يا حاجة شايفاكى واقفة فى طابور العيش مع إنك واخده عيش كتير ومغطياه هناك فى القفه ؟!!!
الحاجة : اقولك بصراحة وما تضرينيش ؟
المذيعة : قولى وما تخافيش
الحاجة : أصلى أنا باخده أبيعه لناس تانيين علشان أكسب قرشين أقدر منهم أعيش
المذيعة تعلق بغضب : آه سوق سودة يعنى ، استغلاليين !!
الحاجة ترد بحسرة : أبدأً والله إحنا مضطرين
المذيعة تنتقل لسيدة أخرى : طب وانت يا ستى ليه واخده عيش كتير ؟!
السيدة : طبعاً لازم آخد كتير علشان أنقى منه اللى ممكن يتاكل ، والبايظ منه بارميه للكتاكيت ، يعنى هاعمل إيه ؟!!
المذيعة تنتقل لطابور التأمين الصحى [/color]
المذيعة تسأل أحد المرضى الواقفين فى الطابور:انت ياللى رجليك مش شايلاك إيه حكاية الطابور معاك ؟!
المريض يجيب بصوت متألم حزين : شوفى يا ستى كان عندى سكر بس جالى عليه الضغط والمرارة والقلب .
المذيعة بانزعاج : يا ساتر يا رب ، ودول جولك منين ؟!!
المريض متالماً : من ذل التأمين وزيت التموين ، وزمان قالوا البلاوى ليها الصبر ، وأهى الطوابير بتعلمنا الصبر !
المذيعة بحسرة : وانت الصادق بتجيب القهر
المريض باستسلام : أهو كله ليه الصبر .
المذيعة تنتقل لطابور آخر
المذيعة : انت يا ستى ممكن أعرف ...المرأة تقاطعها بحدة : هى ناقصاكى ما كفيانا اللى إحنا فيه !
المذيعة : صبرك على َ شوية خلينى أكمل الجملة .
المرأة بتهكم : لا جملة ولا قطاعى روحى شوفيلك حد غيرى ترغى معاه .
المذيعة متعجبة : يا حول الله هىَ خلقها ضيق كده ليه ؟!!
شخص قادم من بعيد : تعالى يا مدام إيه اللى وداكى الطابور ده بس ؟!!
المذيعة باستغراب : ليه هو ده طابور إيه ؟!
الشخص الغريب : ده طابور العوانس من الجنسين .
المذيعة باندهاش : يااااه ...... كل دول مش متجوزين ؟!!
الشخص الغريب : هم لاقيين ياكلوا لما هيتجوزوا !
المذيعة باستغراب : أمال الزيادة السكانية دى جايه منين ؟!!
الشخص الغريب وقد بدا عليه التوهان ( مسطول ): لا مؤاخذة يا ست السكان مش بيزيدوا دى الأرض هى اللى بتضيق عليهم .
المذيعة مبتسمة : بتقول إيه ؟!!
الشخص الغريب : اللى سمعتيه تصدقيه واللا ما تصدقيه .
المذيعة بجدية : على حد علمى المساحة بتزيد بفضل التعمير الجديد .
الشخص المسطول يضرب على فمه مصطنعاً الخوف : تعمير إيه يا ست عايزة تودينا فى داهية المباحث ماليه الحتة .. عموماً لو خرمانة لسه معايا سيجاره خديها من سكات واتدارى هناك فى الحارة .
المذيعة : أنت فهمت .... الرجل يقاطعها : لأ ما باحبش أفهم ، هافهم إيه واللا إيه خلينى كده أحسن هاتعب دماغى ليه ؟! آخد السيجارة وأنسى الهم اللى إحنا فيه .
المذيعة : طيب هات .
الشخص الغريب : أجيب إيه ؟
المذيعة : هات السيجاره
الشخص الغريب يعطيها السيجارة ، تاخد منها نفس عميق وتسعل بشدة
المذيعة : كح كح كح كح إيه ده هى فيها إيه ؟! إمسك دى فيها بلاوى
الشخص يضحك : هات يعنى هتكون أكتر من البلاوى إللى إحنا فيها ؟!!!!!!

هههههههههههههههههه روعه د/وسيمه واشعر ان المذيعه امال فهمى فى "على الناصيه" جميله جدااااااااااااااا وعاجبنى الست اللى خلقها ضيق هههههههههههههه اصل شفت الموقف ده كتير ةبرده حلو اوى ان المذيعه جربت السجارة هههههههههههههههههههههههه انا كنت خايفه بس تتحول من مذيعه الى واحده ف طابور التأمين الصحى!!
شكرا يادكتورة وسيمه ع الابداع المستمر

شكراً أستاذ / محمد ، وشكراً لولا على الإطراء والاستحسان ، وفعلاً يا لولا الدور لايق على آمال فهمى !
:oops: :oops: :oops: :oops: :oops: