وشوش كتييييير !

موضوع: وشوش كتييييير ! السبت أكتوبر 01, 2011 5:54 am

نفسى ألاقى حد ما لوش وشين
نفسى بس ألاقيه فين
فى دنيا البنى آدمين ؟!
ده شكله طيب وأمير
وده برضه مخلص و جميل
هما دول أحسن صديقين
عشت لهم صديق أمين
وفجأة خدت منهم
أكبر أسافين !
إزاى الأمير الجميل
فجأة يكون شرير ومكير ؟!
دول هما هما نفسهم
بس لما قابلتهم
كانوا لابسين وش الليل
وفيه كمان عندهم
لسه وشوش كتير
للصبح والظهر
وكمان للعصر
أما المغرب والعشا
وشوشهم متجهزة !
كان نفسى أقابل حد ما لوش وشين
دلوقتى بقول يارب
ألاقى حد ما لوش أكتر من وشين!!!

هههههههههههه جميل اوى يادكتورة وسيمه وانا قبل كده كتبت جمله التعليق بتاعى"خلق الله للانسان وجها واحدا ولكنه يصنع بنفسه باقى الوجوه" وانا اعتقد انى اعرف ناس جميله جدااااااااااااا صادقه اوى وملهاش وشين وهما ماليين عليا حياتى وهما هيفضلوا اصدقائى علطووووووووول للابد حتى لو بعدوا عنى لان محدش لاقى الناس الصادقه اللى من غير وشين الايام دى فصعب الواحد ينساهم

واعتقد ان عماد غنى للموضوع ده اما قال"كلامى معاك كلام صادق ملوش وشين"بس الشعر جميل اوى المرة يادكتورة حقيقى وختمتيه بروح دعابه جميله جداااااااااااااااااا تسلم ايدك ياحبيبتى

وكما ان الفنكوش اصبح يباع الان فاكيد هيكون فيه محلات للوشوش بعد كده ههههههههههههههههه
وفعلا فيه محل ف مدينتى كلنا مررت من امامه الاقيه كاتب "لدينا الفنكوش"بس اكيد مش زى فنكوش عادل امام!

لما يفتح محل الوشوش قوليلى علشان ألحق أشترى كام وش لزوم مواكبة العصر ومسايرة الموضة !!