عصر .. السرعة !!

مع إننا فى عصر السرعة
وكل شئ وقته اختصر
وأى حاجة بنعوزها
نقدر نجيبها فى لمح البصر
بأى زر من الأزرار !
لكن مشاعرنا ليه ثابتة ؟
ورافضة تسير نفس المسار
مش بس رافضة دى مصرة
تبنى لنفسها جدار
بينها وبين التكنولوجيا
وبتحاربها باستمرار

مسكين يا بن آدم
عايش حياتك تقاوم
اللى عملته علشان يسعدك
هو نفسه اللى بيهلكك
وفرت وقتك وجهدك
ياللا اتحمل غلطتك
حتى طبيعتك رفضتك
إن كلت لحوم
يصيبك جنون
أو حمى قلاعية
حتى إن شربت ميه
ما تأمنش السموم
ده غير الهموم
اللى فى عصرك
من كل حتة بتحاصرك
صبحت حياتك
بركان محموم
ومتعرفش إمتى يقوم ؟

حبيبتى دكتورة وسيمه كل مرة تبهرينى بكلامك الجميل فعلا وفعلا حضرتك عبرتى بالسهل الممتنع شعور ورأى بعض الناس ف عصر السرعه وعجبنى اووووووووووووى المقطع الاول كله الحداشر بيت الاولانيين روعه ف التعبير الصراحه
وكان ليا رجاء عند حضرتك-بعد اذنك طبعا- لو حضرتك كنتى فاضيه فى اى وقت اتمنى من حضرتك ان تكتبى كلمات اغنيه ليه لما بنعشق لعماد عبد الحليم لانى بحب كلماتها جداااااااااااااا وبتفكرنى بأشعار حضرتك الجميله وشكرا يااستاذتى الحبيبه