من اى فيلم هذه الاغنيه؟

امامكم رابط لاغنيه وردت فى فيلم شهير احب هذه الاغنيه وهذا الفيلم ايضا بدرجه لا توصف وان كنت اشعر ان قصته مقتبسه من قصه عالميه او اجنبيه وهم لا يعرضوه كثيرا للأسف انا اعرف الفيلم ولكن لا اعرف الملحن فارجو معرفته منكم؟
الرابط:http://www.4shared.com/audio/MC6QQfsp/222.html
وارسل سلامى المعتاد لكل اعضاء المنتدى الرائع وارسل تحيه خاصه لاستاذى العزيز ا/محمد واريد ان اسئله سؤالا واحدا:ماهو مسلسل الرحايا اللى عماد عبد الحليم غنى المقدمه والنهايه له؟ واشكرك جدااااااااا
وادعو بالشفاء للمطرب محمد نوح الذى -عرفت مؤخرا فقط-انه مصاب بالشلل من عشرين سنه عندما قاموا بهدم مسرحه مسرح النهار بسبب مسرحيه سياسيه وذلك فى عهد مبارك وقال ف الحوار انه دائما كان يكره صفوت الشريف وكان يقول ذلك علانيه والذى كان السبب فى هدم مسرحه ربنا يشفيه يارب فانا احب في ادائه الحماسه وان كان غريب الاطوار قليلا

http://www.4shared.com/audio/u5SuFHSm/_online.html

واقول لكل من رأى هذه المساهمه صباااااااح الخير :|

شكرا لكى اختى العزيزة لولا على هذه الرائعة لحليم يرحمه الله وهى احنا كنا فين وغناها فى فيلم دليلة مع دلوعة الشاشة شادية وهى من الحان الموسيقار الكبير منير مراد ومن تاليف الشاعر الكبير حسين السيد يرحمهما الله الاثنين

شكرا يا لولا وبالفعل الفيلم جميل اما عن اقتباسه فذلك حال معظم افلامنا وانا غير متابع للافلام الاجنبيه

ولا اعرف حتى اسماء ممثليهم ولكن مره بالصدفه شاهدت فيلم عادل امام ومديحه كامل وصلاح نظمى فى النسخه الاجنبيه بالصدفه

لا اتذكر اسم الفيلم ولكن عادل كان لصا سرق مبلغ كبير وهرب الى لوطانده صغيره لا يرتادها احد تسكنها مديحه كامل وزوجها العجوز المريض صلاح نظمى المهم لاحظت ان الفيلم الاجنبي اقدم بالطبع لكن الغريب ان عادل امام قلد نفس حركات البطل ودون اى تغيير فى السيناريو اما توقيعك الحالى فمعناه رائع وحقيقى وانا احب متابعه هذه العبارات القيمه

وبالنسبه للرحايا فهو مسلسل قدم سنه 91 تقريبا وكان ناجح جدا بين يوسف شعبان الذى مثل الشر فى صراعه مع الخير صلاح السعدنى وقد غنى عماد المقدمه والنهايه ومجموعه اغنيات قصيره داخل الاحداث بشكل رائع جدا وفى المنتدى بعض هذه الاغانى

ومقدمه المسلسل باسماء الابطال وغناء الكروان وبالمنتدى ايضا مقالات قدمتها الاخت الغائبه وسيمه للكاتب محمد صالح يشيد

بصوت واداء عماد الذى ادخل الرقه والعذوبه على اللهجه الصعيديه

ومعلومه محمد نوح اول مره اعرفها رغم انه من دمنهور يعنى محافظه البحيره وهو فنان وطنى ومثقف ونرجو له الشفاء

اولا(هههههههه):فعلا عادل امام له افلام كتير مقتبسه واللى حضرتك قلت عليه اسمه الجحيم على مااظن وعصابه حماده وتوتو برده مقتبس وشمس الزناتى مقتبس
ثانيا:اه مسلسل الرحايا اصل نور الشريف ف رمضان اللى فات او اللى قبله كان له برده مسلسل اسمه الرحايا لم اتابعه يعنى الاسماء خلصت خلاص معدتش غير الرحايا شكرا ع المعلومه واكيد عماد جعل للمسلسل مذاق تانى خالص
ثالثا:اه من البحيرة والله راجل جميل بحس انه طيب وخاصه انه قال ف المقال انه بعد ابنتيه عن التمثيل وانه مش شمتان ف حسنى واللى بيحصله الحوار جه ف جرنال صوت الامه 15او18اغسطس مش فاكرة
رابعا:التوقيع فعلا بيخلى الانسان يتحلى بالامل يعنى ان بعد العسر يسرا يعنى الانسان ميزعلش اما تصيبه مصيبه كبيرة فلابد لها ان تنقشع باذن الله حلوة تنقشع طبعا هههههههه
خامسا:معلش انا متعوده احل ف الامتحانات واكلم دايما فى نقط كده عشان منساش دى خامسا
سادسا:شكرا جداااااااا ع ردود حضرتك الممتعه جداااااااااااااا
;) ;) ;) ;) ;)

تنقشع احلى كلمه سمعتها فى حياتى هههههههههههههههههههه تقريبا احمد بدير من المنصوره مش متاكد لكنه

كان صاحب كلمه هبابه احلى كلمه سمعتها سهير البابلى وملحوظه كمان المنصوره هى بلد نجوم الكوميديا عندك كمان يونس شلبي غير عادل امام ومحمد صبحى ومظهر ابو النجا وبصراحه لو بتكتبى كده تضمنى امتياز فى كل ماده

اما انا وحدى انا فكنت بادخل الموضوعات فى بعضها وانا كنت باختار ما اذاكره حتى فى الثانويه العامه رغم انى كنت استطيع فهم اى

ماده وبدون دروس خصوصيه نهائى الا ان الملل كان يتحكم فى اختيارى للموضوعات ولما التحقت بكليه التجاره كنت فرحان جدا

ان الدكاتره كانوا بيلغوا اجزاء كتيره من المناهج والغريب اننى اخترت محاسبه رغم حبي لاداره الاعمال التى حصلت علي الماجستير فيها وكنت اتمنى اكمال الدراسه ولكن كفايه كده خاصه اننا لم نعد بلد بتاعه شهادات صحيح

1-انا فعلا احيانا ما بعرف اضحك على بعض الدكاترة ف الاجابات
2-كليه تجارة انا شايفه انها صعبه رغم انى كنت رياضه2 واللى فيها دايما بيبقوا اذكياء جداااا وكتير نصحونى ادخلها لكن رحم الله امرؤ عرف قدر نفسه انا بحب الكتب جدااااااااا عشان كده دخلت المكتبات
3-وليه حضرتك مكملتش بس الحقيقة ان الواحد يكمل صعبه يعنى ملل شويه بس حسب الاراده

وانا بعتذر برد متأخر الايام دى اصل بجد جهازى يعانى من وعكه صحيه المت به مؤخرا اسفه جداااااااا

ما كملتش لظروف العمل وبعدين مش حاتفرق لان احنا فعلا لسنا بلد مؤهلات ولا كفاءات ونامل ان الثوره

تغير الاوضاع رغم انه من الصعب ذلك فى فتره وجيزه لكن انا عايز اسالك سؤالين من نفسي بقى

اولا هل تعتقدى ان التمثيل حرام وليه

ثانيا هل لو عماد ظل اسمه عماد على سليمان كان نجح اكثر ولا العكس

ههههه من حق حضرتك تسأل انا نازله علطول اسئله بس يعنى انا ردودى عمرها متتساوى بردود حضرتك
اولا:الصراحه انا اعتقد فعلا ان التمثيل حرام لاسباب كتيرة:
1-لبس الممثلين والممثلات خاصه الممثلات طبعا
2-يعنى وظيفه ملهاش لزمه ومش ده العمل اللى ربنا هيجازى عليه الانسان لانه متعبش او هيقول تعبت تعب من ايه من كتر اللبس ولا من كتر الاكل اللى ف الحوارات
3-اللقطات المبتذله اللى قطعا ملهاش لزمه وموجوده ف التمثيل القديم والجديد طبعا
4-بيعلموا الشباب حاجات خطر زى الادمان والخمرة وكده
وفيه اسباب تانيه كتير بس الصراحه مش عارفه اعبر عنها اوى خاصه انى برتبك اما حد بيسألنى ههههههههه
ثانيا:بيتهيألى مكنش نجح خالص ولا اتعرف ابدا لان اقتران عبد الحليم باسمه زاد من قيمته للناس اللى بتاخد بالمظاهر بس لكن انا لو سمعته حتى لو عماد الدكش هحب صوته وكمان اسم عماد على سليمان مش فنى واسم يلخبط كمان
اعتذر عن الاجابات المعوقه طبعا يااستاذ

لا بالعكس كلامك مرتب وممنطق كالعاده ويعجبنى اسلوبك وتنسيق كلامك

لكن انا مختلف فى تحريم التمثيل فاعتقد انه احيانا لاشيء فيه واحيانا حرام حينما يتجه نحو ما ذكرتيه يا لولا

ولكن انا ارى ان اهم معوقات الاسلام حاليا هو جمود الدعاه وعدم اعمال فضيله الاجتهاد والقياس والتى ادت

سابقا الى ظهور المذاهب الاربعه فالعاه حاليا وخاصه اصحاب الفكر السلفى ينتهجون منهجا اعتقد انه يضر بالاسلام لانه يتصف بالجمود

والاحكام الرادعه دون مناقشه ومنهم من يهدم مبدا اسلامى مهم وهو الحسنات يذهبن السيئات فسمعت احدهم

مره يوجه كلامه للفتيات مؤكدا انهن مهما فعلن من صوم وصلاه وذكاه بمجرد سناع الاغانى فالمصير هو عذاب القبر وجهنم وبئس المصير ولو سمع غير المسلم ذلك فمن المستحيل ان يتجه نحو الاسلام وسيصف الدين الاسلامى بانه سجن حاش لله

فكيف لمن تؤدى اركان الاسلام ان تخلد فى النار بسبب سماع الاغانى التى لم يتم تحريمها الا بالتفسير وبانها لهو الحديث دون نص قاطع وبالنسبه للتمثيل يحرمونه بالمره حتى لو كانت اعمال تاريخيه او دينيه وانا اسالهم هل الحواديت حرام وهل قراءه كتب التاريخ والسيره حرام فمثلا حينما نقرا عباره طارق بن زياد العدو امامكم والبحر خلفكم او العكس من لا يتخيل المشهد ومن لا يتخيل الحدوته حينما تحكيها والدته وهو صغير فالتمثيل هو تجسيد لحدوته او فكره او حقيقه تاريخيه

اما عن عماد على سليمان فاسم حليم ساعد المنتجين اكثر من عماد واسم حليم يضمن نجاح اى شخص ولكن موهبه عماد كانت كبيره جدا لكن بالطبع كان من الممكن ان يظل مطربا سكندريا صاحب صوت شجى لا يعرفه احد لولا العندليب يا لولا

كلام حضرتك صح طيب هسأل حضرتك سؤال هل اى عمل حتى لو دينى يستاهل المبالغ الضخمه اللى بياخدوها؟

لا طبعا بالعكس المفروض ياخدو اقل من الئات العاديه لكن المشكله حايقولو الاعلانات بتجيب فلوس والفنان فى الخارج

بياخد اكتر من المواطن العادى وده كلام لاعيبه الكره كمان

ايوة وده بقى جزء من ان التمثيل حرام يعنى الممثل ولا المدرس او الدكتور او اخصائى المكتبات(ههههههه)مثلا ثانيا التمثيل بيؤثر ف شخصيه الانسان اخلاقه مش بتبقى عاليه اوى لانه تعامل مع فئات غريبه ممكن يمثل ف السجن ف كباريه كده يعنى واللى حسن يوسف عمله ف زهرة خير مثال
لكن مشاهدته مش حرام مش عارفه ازاى خاصه اذا كان المتفرج له مبادئ واسس ماشى عليها والا هينحرف علطول صح؟

ياريت المنتدى يتحول لمنتدى حقيقى فيما يخص بالمناقشات بين الاعضاء ورغم ان هذا المنتدى مصمم بشكل رائع

وبمجهود متميز لمصطفى ومحمد الدينى لكن لا اعرف اين ذهبا نرجو الاطمئنان عليهما

وبصراحه لو كل الاعضاء زى لولا والاخت نهى كمان مداوه بشكل جيد جدا كان المنتدى اصبح اكثر تميزا

وانا للاسف مش حاعرف اكمل نقاش لانى لازم اقفل الجهاز الان وشكرا على التواصل المتميز يا لولا

لا عادى سلاااااااام يااستاذ

» من اى فيلم هذه الاغنيه؟
» مااسم هذه الاغنيه؟
» من صاحب هذه الاغنيه الغريبه؟
» هل هذا الصوت وهذه الاغنيه لعماد عبد الحليم
» الاغنيه الجميله "كأنك حد تانى"للكروان اهداء لكل الاعضاء الكرام