من اى فيلم هذه الموسيقى؟

هذه الموسيقى هى بدايه ونهايه فيلم لعادل امام انا احب هذا الفيلم جدااااااااااااااااااااااااا وايضا يعرض كثيرا فى القنوات كل شئ رائع فى هذا الفيلم القصه والتمثيل والموسيقى ماأسم الفيلم؟!
اليكم الرابط: http://www.4shared.com/audio/rSRgPyq_/_----.html
يعنى فيه معطيات ممكن تسهل الحل زى مثلا البطله نيللى فهل عرفتموه؟
study

اقول لكل من رأى هذه المساهمه صباح الخير :shock: :shock:

صباح النور بس مش عارف بتجيبى الحاجات دى منين لكن الفيلم تقريبا الغول وهو من الافلام القليله اللى بحبها لعادل امام

ومعاه فيلم حتى لا يطير الدخان ومسلسل احلام الفتى الطاير لانى مش بحب عادل امام خاصه شخصيته واضح جدا فيها الانتهازيه

والتلون والاستهزاء بالاخرين واحيانا بالمعتقدات والعياذ بالله والانطباعات دى من كلامه وتصريحاته وفنيا انا لا اعتبره ممثل كوميدى جيد لان كوميديته تعتمد على الخروج عن الاداب العامه والخاصه واداب الوثائق والمكتبات كمان وفى مسرحياته ساعات استغرب هى الناس بتضحك على ايه يمكن يكون العيب عندى لكن اعتقد ان ملك الكوميديا المجرده للاضحاك فقط هو سمير غانم وملك المسرح الكوميدى هو محمد صبحى وفى الاخر هى مجرد اراء لكن انا تقريبا دايما ما بحبش اصحاب الشعبيه زى عادل امام وعمرو دياب رغم حبي للعندليب وابو تريكه وهما اصحاب شعبيه طاغيه اما عماد عبد الحليم فلو كنت فنان لا سمح الله لاخترت موضوعات اغانيه

فهو استاذ فى اختيار ما يقدمه رغم كل ما اشيع وقيل عنه

ايوة فعلا هذه موسيقى فيلم الغول لانه كان من بطولة الزعيم عادل امام والنجمة الكبيرة المحبوبة جدا نيللى والملك فريد شوقى ايضا يرحمه الله وانا على فكرة بعشق جدا عادل امام فهو عمل اعمال رائعة جدا وممثل ممتاز جدا خاصة فى اعماله اللى عملها مع المخرج الكبير شريف عرفة والكاتب الكبير وحيد حامد والمسلسل الوطنى الرائع جدا دموع فى عيون وقحة وهو ايضا بالمناسبة كان صديقا لحليم يرحمه الله الذى كان معجبا به جدا الذى وصفه بانه اعظم اختراع للقضاء على الحزن

صح فيلم الغول هههههههههههه الصراحه رأى حضرتك صح جدا بس الواحد احيانا ميقدرش يعيش -ممكن- من غير عادل امام بس حضرتك نبهتنى انه خرج عن اداب الوثائق والمكتبات دى بقى فيها كلام تانى !! اولا هو لايقارن بعماد ثانيا متنكرش ان له افلام حلووة- انا برده بحب فيلم حتى لا يطير الدخان مع ان مفيش حد بيحبه اوى انا مستغربه ان فيه حد اتفق معايا -وبرده فيلم المشبوه وفيلم شفته قريب اسمه قاتل مقتلش حد مع اثار الحكيم اما بقى عشقى الاول والاخير ف لفيلم ع باب الوزير بس ممكن اسأل حضرتك سؤال يعنى ايه ساكسونيا اللى ورد ذكرها ف الفيلم وكمان الفيلم مأخوذ عن روايه اسمها قانون ساكسونيا؟ انا بيتهيألى نوع بارفان ههههههههههههههه

وكمان نها بتحب عادل امام كل افلامه حلوة ماعدا الفتره من اول بخيت وعديله مثلا بدأ يعنى يتدهور لغايه النهارده ثانيا انا متعصبه جداااااااااااااااااااااااااااا لكل شخص من المنصورة مدينتى الحبيبه اما المسرحيات عاديه له مش زى الافلام برده ليا سؤال لحضرتك هو مين الاول المسرحيه بتاعت مدرسه المشاغبين ولا الفيلم اللى اسمه مدرسه المشاغبين؟ اما بقى عن سمير غانم فبيتهيألى انه مش بيمثل عايش كده بالعاميه كده-هلهلى- كل افلامه مليانه اخطاء وتحس كده انه بيكروت فى التمثيل وبرده احلى افلام له اللى مع عادل امام اما محمد صبحى بقى محدش فاهمه لانه دارس اوى زياده عن اللزوم

وانا بقول لحضرتك اشكرك جدااااااا على مبادرتك دايما بالاجابه انا حاسه انه بقى واجب يومى لحضرتك ههههههههههه يعنى عادى لو فيه مرة مش عايز ترد او مش عارف-مع ان دى نادرا ماهتحصل-عادى مش هزعل والله شكرااااااااااا من اعماق قلبى والللى بيعجبنى اكتر اراء حضرتك المتميزة جداااااااااا يعنى انا ببقى احب اعرف رأى حضرتك اكتر من الاجابه ع السؤال نفسه :) :) :) :) :) :) :) :) :) :)

اكيد مسرحيه مدرسه المشاغبين كانت الاول لانها ابيض واسود لكن الفيلم كان فاشل جدا وانا بحب المسرحيه

رغم ان مؤلفها وهو من رواد دعاه التطبيع مع اسرائيل اما عن عادل امام فالاعمال التى ذكرتها الاخت نهى والاخت لولا فعلا جيده

وانا اسف لو كلامى عنه صدم اى احد لكن فعلا انا لا اعتبره ممثل كوميدى جيد وقد يكون افضل فى التراجيديا وعلى فكره ابنه محمد ممثل موهوب ربما اكثر من والده نسيت اذكر اسم على سالم مؤلف مدرسه المشاغبين والتى كانت سببا فى اطلاق لقب الزعيم على عادل امام رغم انه وصف نفسه فى المسرحيه بالزعيم الاونطه وهذا الاقرب للواقع واعتقد ان سعيد صالح ممثل وفنان شامل وقدير الا ان شخصيته اضعف من عادل امام وثقته بنفسه ليست على المستوى

لأ الكلام مصدمش حد لأنه مهما كان ممثل بس برده حضرتك بتكلم عن شخصيته اكتر من افلامه

احنا متفقين على فكره لان معظم او جميع الافلام اللى اتكلمتوا عنها مش كوميديه يعنى عادل امام لما يمثل كويس ويقدم فيلم

كويس بيكون مش كوميدى وفيه فيلم لعادل امام مش فاكر اسمه كان كويس جدا كان معاه الفنانه ايمان وكان مدرس تاريخ

وانا فعلا مش بحب شخصيته انما هو فنان ناجح لكن فى مسرحياته اى حاجه يقولها الناس تضحك حتى لو تم اعادتها كل شويه

وانا شايف ان دمه كان تقيل جدا فى مسرحيه الزعيم وكان بيحاول يقلد مسرح محمد صبحى لكن بدون وعى واضطر كعادته للابتذال

خاصه مع رجاء الجداوى وبالفعل افلامه مع وحيد حامد وشريف عرفه معمولع بحرفيه جيده لكن فكر وحيد حامد تحته خطوط كتير لانه دائم النتشكيك فى اى متدين ويتبنى وجهه نظر مامته امريكا فى الصاق تهمه الغباء والجهل والشر باى ملتحى

صح صح فعلا الزعيم دى غلسه جداااااااااا وعلاقته برجاء وحشه جداااااااا فى اى حاجه ع فكرة

» حكم سماع الموسيقى والغناء - الشيخ الشعراوي
» مسابقة عن عبقرى الموسيقى بليغ حمدى
» مسابقة عن عملاق الموسيقى كمال الطويل بمناسبة ذكراه اليوم
» مسابقة عن عملاق الموسيقى محمد الموجى بمناسبة ذكرى رحيله
» من اى فيلم هذه الاغنيه؟