فى عيد ميلاد الثورة

فى عيد ميلاد الثورة
وقفنا على بابك
ماسكين فى ايدينا شمعة الأمل
وجايبين هدية .. الحرية
لقينا ناس بيمنعونا نحتفل
كانوا متنكرين فى زى حراسك
سألونا انتم مين ؟
قلنا احنا ولادها
قالوا الثوار؟ قلنا الأحرار
قلنا وانتم مين ؟
قالوا احنا اللى هنربيكم
أيوه يعنى انتم مين ؟!
قالوا انتم لسه مش عارفين ؟!
قلنا طب ايه جريمتنا ؟
قالوا الخيانة العظمى
خيانة خيانة مين ؟!
احنا لاقتلنا ولا سرقنا
ولا صدرنا غاز لاسرائيل !
أكيد انتم غلطانين
أكيد قصدكم ناس تانيين
قالوا انتم لسه مش فاهمين ؟!
لا والله لسه مش فاهمين ولا عارفين !
ممكن حد يفهمنا ..
جايز نكون غلطانين ؟!
قالوا حاضر من عنينا الاتنين
امسكوهم .. قيدوهم .. اسحلوهم
خلصونا من الخاينين !
قلنا حتى لو خلصتوا علينا
بكره هيطلعلكم غيرنا ملايين !

تسلم ايدك يادكتورة وسيمه وحضرتك كده دفعتى الغرامه خلاص :)

قصيده جميله جداااااا ومعبرة ومن الصعب التعبير عن الموقف ده بالشعر الصراحه بس هى دى بقى العبقريه فعلا :cheers: :cheers:

والغريب ان استاذ محمد قال اللى كنت عايزة اقوله من زماااااااان ومكنتش عارفه اعبر عنه قال
الثوره المصريه من اكثر الثورات غموضا واثاره للجدل
صح بالفعل او فيه حاجه ناقصه او لسه الثورة لم تكتمل بس مش قصدى انها تكتمل ف 25 الجاى لأ بقى كفايه كده ثورة واحده كافيه جدااااااا انا صحيح كان نفسى اعيش ايام ثورة 1952او ثورة1919 وادينى عاصرت ثورة اكثر عنفا من الثورات السابقه وان شاء الله مادامت هناك حياه ..مادام هناك امل

شكراً لكم جميعا ، أولاً أرحب بالأستاذ إبراهيم لإنضمامه حديثاً لأسرة منتدانا ، ورداً على سؤال الأستاذ ابراهيم طبعاً لم يحدث المنع من الاحتفال بالمعنى المادى المباشر ولكن المقصود منع فرحتنا بالثورة واتهام البعض للثوار بالعمالة والخيانة وإنهم ضيعوا البلد وخربوها على اعتبار انها قبل الثورة كانت أفضل حالاً !!
وطبعاً الجيش هو ظهر مصر ولا يمكن ان يكون هو المقصود بالكلام أو أى من رجاله الشرفاء الأوفياء ، والحقيقة صعب على أى شاعر أن يشرح قصده من الشعر لأن الشعر احساس يجب أن يصل لإحساس المتلقى دون عناء .

واتفق مع رأى الأستاذ محمد فى غموض الثورة المصرية مقارنة بالثورة التونسية مثلاً ، ولكن لكل بلد ظروفه الخاصة به
ولا ننكر أننا جميعاً وقعنا فى حيرة شديدة من تضارب الأقوال لدرجة صعب علينا التفرقة بين الصادق والكاذب ، وحتى الآن شخصية الرئيس القادم صعب تحديدها أو الاتفاق عليها ، وأصبحت تهمة العمالة أو الخيانة موجهة للجميع بلا استثناء ففقدنا الثقة فى الجميع ، ويبدو أن التاريخ يعيد نفسه فقد كانت تهمة الزندقة فى عصر الخلافة العباسية من أسهل التهم للقبض على الناس وقطع رقابهم ، والآن نسمع من يقول أن دفاع المخلوع مبارك يؤكد أن اسرائيل وقطر هم المسئولون عن قتل الثوار ! على اعتبار أن مصر كانت وكالة من غير بواب !

وأقول لولا... مدام حياة هى و( مادام )أمل بتسلم عليكى كتير

( مادامت هناك حياه ..مادام هناك امل ) مادام حياة ومادام أمل لسه موجودين يا لولا وبيقولولك عاملة ايه فى

هههههههههههههههههههههههههههههههههههههههههههههههههههه
الله يسلمهم يادكتورة وسيمه "الصراحه ملحوظه لم اخد بالى منها خالص مدام حياه ومدام امل"هههههههههه
اما عن عامله ايه ف الحمد لله عندى امتحان النهارده الساعه 12ياريت يدعولى

شكراً أخى الأستاذ سمير ، وأؤمن على دعاءك ، اللهم ولى علينا الأصلح وكلل جهود الثورة بالنجاح وأنعم على بلدنا الغالى وأهلها بالأمن والاستقرار والحرية